Lisbonë, 21 Maj 2026
Fondacioni Shqiptar i Garancive për Zhvillim (ADGF) u pranua zyrtarisht si anëtare e AECM – European Association of Guarantee Institutions, pas miratimit nga Asambleja e Përgjithshme e AECM, e zhvilluar në kuadër të eventit vjetor në Lisbonë.
Ky anëtarësim përfaqëson një hap të rëndësishëm në zhvillimin institucional të ADGF dhe në forcimin e bashkëpunimit me institucionet evropiane të garancisë. Përmes këtij rrjeti, ADGF do të ketë mundësi të shkëmbejë eksperienca, të mësojë nga praktikat më të mira ndërkombëtare dhe të kontribuojë në diskutimet mbi rolin e skemave të garancisë në përmirësimin e aksesit në financë për ndërmarrjet mikro, të vogla dhe të mesme.
AECM bashkon institucionet kryesore të garancisë në Evropë, të cilat kanë si mision mbështetjen e bizneseve, nxitjen e sipërmarrjes dhe forcimin e përfshirjes financiare. Duke u bërë pjesë e këtij komuniteti, ADGF forcon më tej pozicionin e saj si një institucion i rëndësishëm në mbështetje të financimit të NMVM-ve në Shqipëri.
Anëtarësimi në AECM krijon gjithashtu mundësi të reja për bashkëpunim, shkëmbim njohurish dhe përfshirje në iniciativa të përbashkëta në nivel evropian. Kjo është veçanërisht e rëndësishme në një kohë kur instrumentet e garancisë po marrin një rol gjithnjë e më të madh në mbështetjen e rritjes ekonomike, qëndrueshmërisë së bizneseve dhe zhvillimit të sektorit privat.
ADGF falënderon AECM për mikpritjen e ngrohtë dhe besimin, si dhe shpreh angazhimin për të qenë një anëtare aktive e këtij rrjeti, duke kontribuar në forcimin e rolit të institucioneve të garancisë në mbështetje të bizneseve.
Përmes anëtarësimit të ADGF, edhe Shqipëria tashmë bëhet pjesë e komunitetit evropian të institucioneve të garancisë.
