Tiranë, 26 Mars 2026
Fondacioni i Garancive për Zhvillim (ADGF) dhe Union Bank kanë nënshkruar një marrëveshje të re garancie në kuadër të Programit EU–KfW Western Balkans Guarantee, duke forcuar më tej bashkëpunimin e tyre në mbështetje të ndërmarrjeve mikro, të vogla dhe të mesme (NMVM) në Shqipëri.
Marrëveshja mundëson zbatimin e dritares së Garancisë së BE-së përmes garancive për kreditë e dhëna ndaj NMVM-ve, me synim përmirësimin e aksesit në financë për bizneset që janë ekonomikisht të qëndrueshme, por që vazhdojnë të përballen me kufizime që lidhen me kolateralin dhe kërkesat e kreditimit. Nëpërmjet këtij bashkëpunimi, ADGF dhe Union Bank synojnë të mbështesin qëndrueshmërinë e bizneseve, të nxisin investimet dhe të kontribuojnë në rritjen e qëndrueshme të sektorit privat.
Ky partneritet pasqyron gjithashtu një angazhim të përbashkët për forcimin e konkurrueshmërisë së ndërmarrjeve shqiptare dhe mbështetjen e afrimit gradual të tyre me standardet evropiane, në një kohë kur aksesi në financim të përshtatshëm mbetet thelbësor për zhvillimin afatgjatë.
Marrëveshja u nënshkrua nga znj. Gertjana Drita, Drejtore Ekzekutive e ADGF, dhe znj. Flutura Veipi, Drejtore e Përgjithshme Ekzekutive e Union Bank.
Ky hap i ri në bashkëpunimin ndërmjet ADGF dhe Union Bank zgjeron më tej përdorimin e instrumenteve të garancisë si një mekanizëm efektiv për mbështetjen e NMVM-ve dhe rritjen e mundësive të financimit në tregun shqiptar.
