Në dhjetëvjetorin e themelimit të Fondacionit Shqiptar të Garancive për Zhvillim (ADGF), Drejtoresha Ekzekutive, znj. Gertjana Drita, theksoi rëndësinë e këtij momenti si një reflektim mbi suksesin, partneritetet dhe ndikimin e fondacionit në ekonominë shqiptare.

“Sot, nuk festojmë vetëm një përvjetor – por një histori suksesi, bashkëpunimi dhe impakti konkret në zhvillimin e ekonomisë shqiptare,” u shpreh znj. Drita në fjalën e saj hapëse.

Ajo rikujtoi fillimet e ADGF në vitin 2015, me mbështetjen e Bashkimit Evropian dhe Qeverisë Shqiptare, përmes programit IPA, si dhe zgjerimin e mëvonshëm të fondit me kontributet e Qeverisë Gjermane përmes KfW.

Falë këtij bashkëpunimi, ADGF ka garantuar mbi 200 milionë euro kredi, duke mbështetur më shumë se 30 mijë biznese në të gjithë sektorët dhe rajonet e vendit.

“Kemi ndihmuar që ide të guximshme të kthehen në biznese reale, që jo vetëm mbijetojnë, por rriten dhe krijojnë vende pune,” – theksoi ajo, duke nënvizuar rolin e garancive në nxitjen e zhvillimit të qëndrueshëm dhe përfshirës.

Znj. Drita shprehu mirënjohje të veçantë për donatorët ndërkombëtarë, Bordin e ADGF, partnerët financiarë dhe ekipin e fondacionit, duke theksuar se “dedikimi dhe profesionalizmi i tyre janë forca e vërtetë e këtij institucioni.”

Në përfundim, ajo prezantoi identitetin e ri të ADGF, si simbol i zhvillimit dhe i kapitullit të ri që fondacioni po hap pas një dekade impakti.

“Pas dhjetë vitesh zhvillimi dhe transformimi, ADGF ka sot një pamje të re, më gjithëpërfshirëse dhe më përfaqësuese të misionit tonë.

E ardhmja është një kapitull i ri që do ta shkruajmë bashkë – me besim, partneritet dhe vizion për një ekonomi shqiptare më të fortë, më të gjelbër dhe më të qëndrueshme.”